مجلس الهرج والهروج

من طرف ابن الجراح الأحد يناير 20, 2008 9:53 pm

يامرحبا أكتب إلي في خاطرك هذا مجلس هرج

بسم الله الرحمن الرحيم

السلام عليكم:

مادام هذا المجلس حق هروج و سواليف.. اجل بهرج عن الاختبار الي اختبرته اليوم.. و لحسه الي صارت لي قبل الاختبار..

انتم عاد تعرفون اني دافوووور في الدروس و شاطر فيها و دائم تقدير جيد ولا جيد جيداً ولا أحب آآخذ ممتاز عشان اخاف من العين<<< واحد فاشل يبغى يصرف نفسه

المهم هرجتي مع جدول اختبارات الجامعه..

الجامعه قالت لنا ان جدول الاختبارات النهائيه حيكوون في موقع الجامعه و حينزل في 4/1 في يوم الاربعاء انا عاد دخلت على الموقع في اليوم المحدد وشفت الجدول حقي كان أول يوم عندي 13/1 مادة " مدخل علوم الحديث ".. أنا انبسطت قلت الاختبارات حتتأخر شوي و اريح شوي من الدروس الي صكت براسي<<<< واحد نصاب من يوم هو صغير ما يفك كتبه الا وقت الاختبار حتى المدرسين يعطوني درجات على نظافة كتبي لأني اصلاً ما شوفها الا وقت الاختبار و تقعد الكتب نظيفه طوال الفصل الدراسي..

انا عاد قلت ببدأ أذاكر الماده في يوم الاحد لأن الاختبار حيكون يوم الثلاثاء.. قلت أنا الحين يبغالي طابعه عشان اطبع الجدول قلت خلني اطبعه يوم الخميس.. جاء يوم الخميس ولا طبعت ولا شيء جاء يوم الجمعه وقابلت احد من اخوياي قلتله اطبع لي الجدول حق الاختبارات قلي خلاص حطبع لك ومرني بعد صلاة العشاء قلتله خلاص ان شاء الله امرك.. كان يوم الجمعه هو يوم عاشورا 10/1... مريت عليه الساعه 11 ليلاُ.. و اعطاني الجدول حقي أنا يوم شفت الجدول انصدمت صدمه قويه قاعد اطالع في الجدول و أنا مصدوم صاحبي يقول وشفيك وش صار انا في ذاك الوقت نفسيتي زي الزفت مالي خلق ارد عليه.. قلتله أن بكره يوم السبت 11/1 علي أختبار في مادة ( مدخل الشريعه ) قلي زميلي يعني ما فكيت الماده ولا ذكارتها.. قلتله انا حسبت ان اول اختبار لي حيكون يوم الثلاثاء مو يوم السبت.. انا عاد ما فكيت الكتاب ولا ذكارته منه ولا شيء لأن المنهج طويل جداً يعني يبغالي أذاكر 240 صفحه و الاختبار بكره و انا باقي ما فكيت الماده.. يعني انكبت نكبه مالها داعي.

قلي زميلي ليه انت ما نتبهت يوم شفت جدولك على النت ان اول يوم هو يوم السبت قلتله لا ما نتبهت.. انا عاد قللت خلني اتصل على زميلي الي معي في الجامعه.. اتصلت عليه قلتله ذاكرت الماده حقت يوم السبت قلي اي يوم سبت قلت يوم السبت الي هو بكره قلي لا لا تشيل هم...
الجدول ما شي على التقويم ومو ماشي على حسب الرؤيا وقلي بعد أن واحد من أصحابه أن عنده اختبار في يوم 10/1 الي هو يوم السبت على حسب التقويم و يوم الجمعه على حسب الرؤيا.. وقلي يعني ان يوم الاختبار حيكون يوم الاحد أنا عاد انبسطت ورتحت.. عاد انا شكرته و دعيتله.. انتهت المكالمه.

يوم الاختبار..

رحت الجامعه بعد صلاة الفجر و كلي أمل أني أجيب درجه تبيض الوجه..
دخلت الاختبار و أنا مذاكر من مذكرة دكتور غير الدكتور الي يدرسنا لأن الدكتور الي يدرسنا معطانا مذكره نذاكر منها يعني ما عندك الا الكتاب
تفكه و تذاكر منه.. أنا بالنسبه لي أن هذا الشيء مستحيل أني أذاكر من الكتاب لأن 240 صفحه متخلص الا بعد أسبوع كامل..
المهم.. دخلت القاعه و أشوف الشباب متشائمين ما في أحد متفائل كلهم مقفلين و اصله معهم كل واحد يقولي صعب و الثاني نص الكتاب ما فكيته
بس أنا عاد عندي مثل شهير و في نفس الوقت شعار لي في مثل هذه الازمات و النكبات الي هو (( طنش تعش تنتعش )) فمسكت طريق التنطيش
و الله عاد جت الورقه و أنا زي المتنح ماني داري اش الهرجه.. عاد سميت بالله و أمسك القلم و أكب الي حفظته على الورقه..
عاد تعرفون ان نص الاجوبه تأليف في تأليف بس مشي حالك.. خرجت من الاختبار و أنا قاعد أضحك على نفسي من الاجوبه الي كتبتها و شفت الشباب قدامي بعد ما خرجت من القاعه كلهم يدعون عليه و يحشون فيه يعني ما بقوا فيه شيء.. يعني شوي و يكفرونه بس خلها على ربك

تقريباً هذه الي حبيت أقوله و أتكلم عنه.. ونبغى نشوف سواليف الشباب وش صار معهم في الامتحانات.

و الي يبغى يعرف الدرجه الي خذتها في الاختبار.. الدرجه هي 60 من 100 يعني لو نقصت درجه واحده أكون في عداد الراسبين بس شكل الدكتور دفني و شاتني بالدرجات حتى مشيت.. أهم شيء النجاح.

من طرف ابن الجراح الإثنين يناير 21, 2008 4:10 pm

سلمت سلمت تعبت وانا اقرا الله يوفك انشاء الله
( طبعن ماقصرت ولابتقصر وانت ماتقصر ولاتقصر) المح في الاختبارات وخل عقلك معها وخل المنتدى يقعد لالالالالا يسمعني شباب بعدين يهرفني ماقلت شي silent

من طرف الصقر الجمعة يناير 25, 2008 5:23 pm

ههههههههههههههههههههههههههههه
الله يقطع ابليسك
ولله ماعندي شي لاكن عندي طنقره حقت العبيد عشان الاختبارات

مجلس الهرج والهروج

مجلس الهرج والهروج

رد: مجلس الهرج والهروج

رد: مجلس الهرج والهروج

رد: مجلس الهرج والهروج